南投縣立育樂國民小學本土語言教育資源網: 閩南語童謠念唱比賽範本

◆一的炒米芳

一的炒米芳，二的炒韭菜
三的沖沖滾，
四的少米粉，五的五將軍
六的攬子孫，
七的七蝦米，八的縖肚綰
九的倒在蠕，
十的倚起來看。
打你千，打你萬，打你一千過五萬，老鼠仔欲啁就緊啁，不啁給你打到啁。

一鼠做頭名，二牛駛犁兄，
三虎爬山崎，四兔遊京城，
五龍皇帝命，六蛇予人驚，
七馬跑兵營，八羊食草嶺，
九猴爬樹頭，十雞啼三聲，
十一狗顧門埕，十二豬真好命。

目光光，秀才郎，騎白馬，過南塘，
南塘未得過，掠貓仔來接貨，
接未著，舉竹篙，撞厲鷂，
厲鷂跋落田，嫁酒瓶，酒瓶欲貯酒，
嫁掃帚，掃帚欲掃地，嫁予賣雜細，
賣雜細欲搖鈴鐺，嫁覡公，
覡公欲讀疏，嫁破布，破布欲補衫，
嫁牛擔，牛擔欲犁田，嫁酒瓶，
酒瓶走入孔，萬汝仔無頭鬃。

初一早，初二早，初三睏到飽，
初四接神，初五隔開，初六舀肥，
初七七元，初八完全，初九天公生，
初十有食席，十一請子婿，
十二請諸婦子返來食泔糜配芥菜，
十三關老爺生，十四月光，
十五是上元暝。

韭菜花，韭菜籽，煮落芳芳芳，
兄呀兄，嫂呀嫂，十七十八欲嫁翁。
嫁何位？嫁錢你錢鳳陽，
繡裙十六幅，繡鞋十六雙，
繡鴛鴦，繡雞公，
做人的雞公早早啼，
做人的媳婦早早起，入大廳，
拭桌椅，入灶腳，洗碗箸，
入繡房，做針黹，譽勞兄，譽勞弟，

譽勞親家親姆敖教示。

烏面祖師公，白目眉，
無人給你請，各自來，
一個面是笑咳咳，
笑到一個嘴裂疏疏，
到底笑哈事舉椅頭仔看目眉，
椅頭仔踏無好，跋落來。

一個緣投仔兄，予婦打生驚，
正月初一日，透早去拜正，
褲穿長短腳，上路坦橫行，
人看真好笑，假愚假無聽，
丈姆看一見，氣到不出聲，
食蚶無剝殼，食肉揀硬背，
酒做一下醉，房間四界拋，
好是丈姆厝，無得食打背。

天烏烏，不落雨，蕃藷一袋二百五，
討海人真艱苦，船仔停到日半晡，
欲去又烏影，不去又吊鼎，
阿兄講不去，阿嫂訶得行，
大風大水來打拚，掠著一尾三斑魚，
扛到門口呈，阿兄講欲賣，
阿嫂講欲食，蕃藷簽無地糴，
魚仔一大碗，捧著繞饒仔食。

白翎鷥，擔畚箕，
擔到溪仔墘，跋一倒擷著一仙錢，
買大餅，分大姨，
大姨嫌無餘，呼雞呼狗來咒詛，
咒詛無，投姆婆，
姆婆去做客，投大伯，大伯去賣龜，
投姊夫，姊夫去賣紙，
投來投去投著我，害我心肝博博彈，
雞母換雞鴽，雞鴽會生卵，
有米兼有飯。

喓！喂！喂！臺灣出甜粿，
甜粿真好食，臺灣出木屐，
木屐真好穿，臺灣出鴐鴒，
鴐鴒會講話，臺灣出棉被，
棉被蓋會燒，臺灣出芎蕉，
芎蕉真大排，臺灣出蕃藷，
蕃藷會止飢，臺灣出飛機，
飛機真敖飛，臺灣出鼓吹，
鼓吹歕會響，臺灣出炸彈，
炸彈真厲害，歹人不敢來。

阿婆婆入來坐，吃粥配田螺，
田螺鹹篤篤，阿婆生子隻頭凸。
日本打英國，英國一下輸，
大頭仔賣紅龜，
紅龜圓圓，大頭仔賣粉圓，
粉圓燒燒，大頭仔賣芎蕉，
香蕉冷冷，大頭仔賣龍眼，
龍眼無肉，大頭仔賣豬肉，
豬肉秤無夠，大頭仔倒地哭，
哭一傍，哭到面黑黑。

一年的炊田粿，二年的捧去賣，
三年的買一塊，四年的無買賣真歹勢
五年的車落溝仔底，
六年的拾起來洗。

大頭旺仔一粒珠，相打不認輸，
舉竹篙撞金龜，金龜一下飛，
大頭旺仔放風吹，風吹斷了線，
大頭旺仔傢伙去一半。